Kategori: Uncategorized

Ndarja e pushteteve dhe pavarësia e gjyqësorit u diskutua në një tryezë të mbajtur në Prishtinë më 25 janar, organizuar nga EUKOJUST, projekti i financuar nga BE për reformën e sistemit të drejtësisë. Raporti për Ndarjen e Pushtetit dhe Pavarësinë e Gjyqësorit me zgjidhje kushtetuese krahasuese, jurisprudencën përkatëse të GJED-së dhe strukturën krahasuese të Ministrisë së Drejtësisë u  prezantua nga eksperti afatshkurter i EUKOJUST prof. Ivan Vanja Savić.

Ekspertët e EUKOJUST dhe zyrtarët e sistemit të drejtësisë së Kosovës (Enver Peci, Kryetar i Gjykatës Supreme të Kosovës,  Aleksandër Lumezi, Kryeprokuror i Shtetit, Blerim Sallahu, Zëvendësministër, Albert Zogaj, Kryesues i Këshillit Gjyqësor të Kosovës, Jetish Maloku, Kryesus i Këshillit Prokurorial të Kosovës dhe Enver Fejzullahu Drejtor i Akademisë së Drejtësisë) paraqitën pikëpamjet e tyre dhe zhvillimin e një baze të përbashkët për bashkëpunim efektiv ndërmjet tri degëve të pushtetit brenda Sistemit Ligjor të Kosovës (legjislacion-ekzekutiv-gjyqësor) dhe gjetjen e mekanizmit për arritjen e një bashkëpunimi më të mirë për aktivitetet reformuese dhe për përmbushjen e kritereve për procesin integrues në BE, pa rrezikuar pavarësinë e gjyqësorit.

Kjo është e rëndësishme për arritjen e një kuptimi të përbashkët të kornizës në të cilën palët e veçanta të interesit veprojnë, si dhe gjetjen e mënyrave më të mira për bashkëpunim të ndërsjellë. Kjo është e nevojshme për reformat që janë thelbësore në proceset integruese evropiane të Kosovës.

Punëtoria treditore për Hartimin e Rregullores për organizimin e brendshëm dhe sistematizimin e vendeve të punëve në Shërbimin Korrektues të Kosovës, është mbajtur së fundi në Pejë, organizuar nga EUKOJUST.

Në një diskutim të hapur zyrtarët e Shërbimit Korrektues të Kosovës dhe ekspertët ndërkombëtarë të EUKOJUST-it bashkërisht punuan në zhvillimin e një vizioni të qartë të kompetencave, roleve dhe përgjegjësive të Shërbimit Korrektues, për riorganizimin e brendshëm në Drejtorinë e Përgjithshme si dhe në institucionet korrektuese.

Aktiviteti ishte edhe një hap tjetër drejt objektivit të hartimit të një Rregulloreje e cila do të avancojë dhe zhvillojë shërbimin korrektues në Kosovë, si një mekanizëm i rëndësishëm në kuadër të të gjithë sistemit të drejtësisë në Kosovë.

Reforma e organizimit të brendshëm synon avancimin e Shërbimit Korrektues të Kosovës, funksionalitetin e tij, kushte më të mira për punonjësit e tij, si dhe trajtim më të mirë të të burgosurve sipas standardeve ndërkombëtare.

Takimi i pestë i Komitetit Drejtues i Projektit EUKOJUST i financuar nga BE-ja, u mbajt të hënën, më 24 janar 2022 në Prishtinë në një format hibrid, me prezencë fizike dhe virtuale. Takimi u kryesua nga zëvendësministrja e Drejtësisë, znj. Nita Shala.

Të pranishëm në këtë mbledhje ishin edhe anëtarë të tjerë me të drejtë vote: z. Albert Zogaj – Kryetar i Këshillit Gjyqësor, z. Enver Peci – Kryetar i Gjykatës Supreme, z. Jetish Maloku – Kryetar i Këshillit Prokurorial, z. Enver Fejzullahu – Drejtor I Akademisë së Drejtësisë, z. Mentor Borovci – nga Zyra e Kryeministrit, z. Fehmi Stublla – Gazeta Zyrtare.

Temat kryesore të diskutimit ishin aktivitetet dhe arritjet e Projektit gjatë raportit të katërt tremujor që mbulon periudhën tetor – dhjetor 2021.

Program i Bashkimit Evropian për sektorin e sundimit të ligjit në Kosovë – EUKOJUST organizoi një tryezë në format hibrid ku u paraqitën gjetjet dhe rekomandimet nga raportet e vlerësimit për infrastrukturën e Teknologjisë për Informim dhe Komunikim (TIK), infrastrukturën e gjykatoreve dhe arkivat në gjykata dhe prokurori.

Në tryezë morën pjesë Kryesuesi i Këshillit Gjyqësor të Kosovës (KGJK), Albert Zogaj, Kryesuesi i Këshillit Prokurorial të Kosovës (KPK), Jetish Maloku, Zyra e Bashkimit Evropian në Kosovë, përfaqësues të akterëve ndërkombëtar, administratorët e gjykatave dhe prokurorive, dhe departamentet përkatëse të TIK-ut dhe Arkivave të KGJK-së dhe KPK-së.

Rritja e mëtejshme e digjitalizimit të gjykatave dhe prokurorive u theksua si një gurthemel për rritjen e efikasitetit, transparencës dhe llogaridhënies së gjykatave dhe prokurorive në ndarjen e drejtësisë.

Kryesuesit e KPK-së dhe KGJK-së e mirëpritën organizimin e kësaj tryeze dhe shprehën përkushtimin e tyre për t’i udhëhequr dhe mbështetur iniciativat që i kontribuojnë digjitalizimit të proceseve të punës në gjykata dhe prokurori.

Më 19 janar 2022, projekti EUKOJUST mbajti punëtorinë me temën “Udhëheqja e Procesit të Hartimit të Akteve Juridike” me përfaqësues të Zyrës Ligjore të Zyrës së Kryeministrit dhe të akademisë. Qëllimi i punëtorisë ishte të sqarohen disa çështje themelore në lidhje me shtjellimin e Manualit për Hartimin e Legjislacionit dhe përditësimin e Manualit të Përafrimit, si dhe për të diskutuar për hapat e ardhshëm. Pas diskutimeve konstruktive, aktive dhe të fokusuara, shprehjes së nivelit të lartë të pronësisë së procesit nga përfaqësuesit e ZLZKM-së, pjesëmarrësit ranë dakord për modelet referuese për Manualin për Hartimin e Legjislacionit, përmbledhjen e Manualit, temat që duhet përditësuar në Manualin e Përafrimit si dhe për hapat e mëtejshëm.

Reagimi i grave ndaj dhunës në familje dhe nxitja e institucioneve dhe shoqërisë civile në luftimin e këtij fenomeni negativ, u diskutuan të hënën, më 20 dhjetor 2021, në një tryezë të organizuar nga projekti i financuar nga BE-ja ‘EUKOJUST’, në partneritet me Ministrinë e Drejtësisë. Zyrtarë të institucioneve; Qeverisë, Kuvendit e shoqërisë civile paraqitën pikëpamjet e tyre mbi praninë e dhunës në familje në Kosovë dhe mënyrat për luftimin e saj.

E pranishme ishte edhe një viktimë e dhunës në familje, e cila po pas dhunës disa vjecare në familje po përballet me kërcënime të vazhdueshme në njërën anë, dhe mungesë trajtimi adekuar nga ana e sistemit të drejtësisë në Kosovë. Të pranishme në tryezë ishin Ministrja e Drejtësisë, Albulena Haxhiu, deputetja Duda Balje, përfaqësuesja e Rrjetit të Grave të Kosovës, Adelina Berisha, përfaqësuesja e Zyres së BE-së, Lumnije Azemi, si dhe përfaqësuesit e projektit të financuar nga BE, EUKOJUST, Volkmar Theobald, lider i ekipit dhe Bardhë Krasniqi, ekspertje e EUKOJUST për edukim juridik të publikut: dhuna në familje dhe grupet e margjinalizuara.

Projekti EUKOJUST dhe Zyra e BE-së në Kosovë u zotuan se do të ndihmojnë institucionet, përfshirë dhe shoqërinë civile me ekspertizë të nevojshmë për luftimin sa më efikas të dhunës në familje. EUKOJUST e ka një objektivë specifike që të forcojë qasjen në drejtësi për të gjithë qytetarët në Kosovë, veçanërisht në fushën e dhunës në familje dhe grupeve të margjinalizuara.

Zyrtarë të sistemit prokurorial, të mbështetur nga projekti i BE-së për Sektorin e Drejtësisë në Kosovë, EUKOJUST, zhvilluan një punëtori dy-ditore për të finalizuar draftimin e Planit Strategjik 2022-2024. Punëtoria shënon fazën e fundit e të procesit të hartimit të planit strategjik para miratimit të tij nga ana e Këshillit. Projekti EUKOJUST e ka mbështetur Këshillin Prokurorial të Kosovës gjatë gjithë procesit me ekspertizë dhe këshilla.

Gjatë diskutimeve të draftit të Planit Strategjik dhe Planit të Veprimit, një theks i veçantë është vënë në planifikimin e politikave për menaxhimin e sistemit prokurorial në tri vitet e ardhshme. Synimi është që sistemi në tërësi të sigurojë një ngritje të vazhdueshme të profesionalizmit, efikasitetit dhe fuqizimit të pavarësisë, integritetit, llogaridhënies dhe transparencës, duke u mbështetur në kompetencat kushtetuese dhe ligjore. Pjesëmarrësit konstatuan se Plani përmban aktivitete dhe veprime të realizueshme dhe specifikon monitorimin sistematik të zbatimit të tij, të specifikuara në Planin e Veprimit.

Në punëtori morën pjesë anëtarë të Këshillit Prokurorial të Kosovës, kryeprokurorë të prokurorive, prokurorë të Zyrës së Kryeprokurorit të Shtetit, anëtarë të Grupit punues për hartimin e këtij drafti, zyrtarë nga radhët e administratës së sistemit prokurorial të Kosovës, dhe përfaqësues dhe ekspertë të projektit EUKOJUST.